Sol D'One 2000

Es bida ta k’ma un naviu sen rum' i sen distinu
Bida di kriol ê navega nes mar sen fin
N viaja sen rum, N viaja ruin
N viaja sen grasa i sen ligria d'navegador

Nôs bida foi sempr' asi nes mar sô di amargura
Un bida na balansa sen kontrapes ê un kriatura
Pesal un dia, pesal mansin dal sê ligria
Lenbra k'ma el ê sofre dor

Ô mund si algun dia bo muda di rum
Mudal konsiensia, mudal justisa
Troka d' naviu, ma tanben tripulason
Trocal ku pasiensia, trocal razon

Si vive ê un misao, si vivê ê kunpri distinu
Jal kunpri d’seu, gora faltal ê sô morre
Jal kre txora, jal kre sô grita
Grita ku tudu forsa, grita ku tudu se sofriment
Es mund ê un mund ingrót
Mund trist, ô ki munt di maldad
Un mund di fulia, un mund d' tristeza i sen ligria
Un mund sen pas, un mund so d' torment
Es mund d' agora ka konxe un sentimentu

Ô sol sob Kabverd, sol d’one 2000
Lembra d' nha terra, lembra d' ses gent
Espalha bos raios, ma espalhas k’mas aligria
Espalhas k’certeza, ma pa tud gent